کلکتہ: انصاف نیوز نیٹ ورک
مولانا ابوالکلام آزاد کے نام پر سیاست اور ان کی شخصیت کو مخصوص مذہبی و سیاسی دائرے میں محدود کرنے کی کوششوں پر تنقید کرتے ہوئے قائد اردو شمیم احمد نے کہا ہے کہ مولانا آزاد آزاد ہندوستان کی تاریخ کی ایسی غیر معمولی شخصیت ہیں جن کے افکار و نظریات آج بھی ملک میں اتحاد، یکجہتی، قومی ہم آہنگی اور مشترکہ تہذیبی اقدار کو فروغ دینے میں اہم کردار ادا کرسکتے ہیں۔ ضرورت اس بات کی ہے کہ مولانا آزاد کے نام کو سیاسی مفادات کے لیے استعمال کرنے کے بجائے ان کے حقیقی کردار، نظریات اور عملی زندگی سے رہنمائی حاصل کی جائے۔
شمیم احمد نے کہا کہ مولانا آزاد کے ساتھ ایک بڑا المیہ یہ ہے کہ ایک طرف انہیں صرف مسلمانوں کے رہنما کے طور پر پیش کرکے ان کی شخصیت کے دائرے کو محدود کردیا جاتا ہے، جس کے نتیجے میں ملک کی وسیع تر آبادی ان کی فکر، سیاسی بصیرت اور قومی خدمات سے پوری طرح واقف نہیں ہوپاتی۔ دوسری طرف خود مسلمانوں کا رویہ بھی مایوس کن ہے۔ مسلمان مولانا آزاد کا نام تو لیتے ہیں، لیکن ان کے افکار و نظریات کے صرف انہی پہلوؤں کو اختیار کرتے ہیں جو ان کی پسند، ضرورت یا موجودہ سیاسی حالات سے مطابقت رکھتے ہیں، حالاں کہ مولانا آزاد کی شخصیت اور فکر اس طرح کی انتخابی سوچ اور تنگ نظری سے کہیں زیادہ وسیع تھی۔
انہوں نے کہا کہ مولانا آزاد محض ایک مذہبی رہنما یا مسلمانوں کے سیاسی نمائندے نہیں تھے بلکہ وہ ایک عظیم دانشور، صاحبِ بصیرت صحافی، بے مثال خطیب، مجاہدِ آزادی اور قومی یکجہتی کے علمبردار تھے۔ انہوں نے آزادی کی جدوجہد میں اپنی زندگی کے قیمتی سال صرف کیے اور تقسیم کے مشکل دور میں بھی ہندوستان کی مشترکہ تہذیب اور قومی اتحاد کے تصور پر غیر معمولی استقامت کا مظاہرہ کیا۔ آزاد ہندوستان کے پہلے وزیر تعلیم کی حیثیت سے بھی ان کی خدمات ملک کی تعلیمی اور فکری بنیادوں کو مضبوط بنانے میں اہم رہی ہیں۔
شمیم احمد کے مطابق آج جب ملک میں مذہبی، سماجی اور سیاسی سطح پر تقسیم اور عدم اعتماد کا ماحول پیدا کرنے کی کوششیں ہورہی ہیں، مولانا آزاد کی فکر کی اہمیت مزید بڑھ جاتی ہے۔ ان کا پیغام صرف ماضی کی تاریخ کا حصہ نہیں بلکہ موجودہ ہندوستان کے لیے بھی عملی رہنمائی فراہم کرتا ہے۔ ان کے افکار کو کسی ایک مذہب، طبقے یا سیاسی جماعت کی ملکیت سمجھنا درست نہیں ہوگا۔
انہوں نے کہا کہ مولانا آزاد کو یاد کرنے کا مطلب صرف ان کی سالگرہ یا یومِ وفات پر تقریبات منعقد کرنا، ان کے نام پر تقاریر کرنا یا سیاسی ضرورت کے تحت ’’پیغامِ آزاد‘‘ جیسی کانفرنسیں منعقد کرنا نہیں ہے۔ اصل ضرورت یہ ہے کہ ان کے علمی، فکری، تعلیمی اور قومی ورثے کو نئی نسل تک پہنچایا جائے اور ان کے نظریات کو سماجی زندگی میں عملی طور پر نافذ کرنے کی کوشش کی جائے۔ ان کے مطابق حالیہ برسوں میں مولانا آزاد کی شخصیت اور افکار کے انتخابی استعمال کا رجحان بھی بڑھا ہے۔
اویسی کے بیان کے تناظر میں شمیم احمد کی تنقید
اگرچہ شمیم احمد نے اپنے بیان میں کسی سیاسی رہنما کا نام نہیں لیا ہے، تاہم ان کے اس بیان کو آل انڈیا مجلس اتحاد المسلمین کے سربراہ اسدالدین اویسی کے اس بیان کے تناظر میں دیکھا جارہا ہے جس میں انہوں نے مبینہ طور پر کہا تھا کہ مسلمانوں کو گاندھی اور نہرو کی ضرورت نہیں اور نہ ہی مولانا آزاد جیسے رہنما کی ضرورت ہے۔ اس بیان کے بعد مسلم سیاسی قیادت، قومی تحریکِ آزادی اور مولانا آزاد کے تاریخی کردار کے حوالے سے ایک نئی بحث شروع ہوگئی تھی۔
ایسے میں شمیم احمد کا یہ بیان اس بحث کو ایک مختلف زاویہ فراہم کرتا ہے۔ ان کی تنقید کا بنیادی نکتہ یہ ہے کہ مولانا آزاد کی شخصیت کو اپنی سیاسی ضرورت کے مطابق قبول یا مسترد کرنے کے بجائے ان کی پوری فکری اور قومی میراث کو سمجھنے کی ضرورت ہے۔ مولانا آزاد کے نظریات کا انتخابی استعمال نہ صرف ان کی شخصیت کو محدود کرتا ہے بلکہ نئی نسل کو بھی ان کے حقیقی افکار سے دور رکھتا ہے۔
شمیم احمد نے زور دیا کہ مولانا آزاد کو حقیقی معنوں میں خراجِ عقیدت اسی وقت پیش کیا جاسکتا ہے جب ان کے نام کے بجائے ان کے کردار کو، ان کی تصویروں کے بجائے ان کی فکر کو اور سیاسی نعروں کے بجائے ان کے عملی پیغام کو اہمیت دی جائے۔
