کلکتہ : انصاف نیوز نیٹ ورک
کلکتہ شہر کی معروف سماجی، ملی اور ادبی شخصیت جمیل منظر کا طویل علالت کے بعد آج صبح انتقال ہوگیا۔ ان کے انتقال کی خبر سے شہر کی سماجی، ملی اور ادبی حلقوں میں غم و افسوس کی لہر دوڑ گئی ہے۔ شہر کی متعدد ممتاز شخصیات نے ان کے انتقال پر گہرے رنج و غم کا اظہار کرتے ہوئے اسے کلکتہ کے سماجی و ملی حلقوں کے لیے ایک بڑا نقصان قرار دیا ہے۔
جمیل منظر کلکتہ کے متعدد اہم اداروں سے وابستہ رہے اور مختلف اوقات میں ان کی سربراہی اور انتظامی ذمہ داریاں بھی سنبھالیں۔ ان اداروں میں محمڈن اسپورٹنگ کلب، یتیم خانہ اسلامیہ اور اسلامیہ اسپتال سمیت کئی اہم ادارے شامل ہیں۔ وہ آل انڈیا مسلم پرسنل لا بورڈ کی مجلسِ عاملہ کے رکن بھی تھے۔ 2008 اور 2009 میں کلکتہ میں منعقد ہونے والے مسلم پرسنل لا بورڈ کے اجلاسوں کے انعقاد میں انہوں نے سابق مرکزی وزیر سلطان احمد کے ساتھ مل کر اہم کردار ادا کیا تھا۔
جمیل منظر کی شخصیت کا ایک نمایاں پہلو اردو زبان و ادب سے ان کی وابستگی بھی تھی۔ انہیں وراثت میں ملنے والے ادبی جریدے ماہنامہ ’سہیل‘ کی ادارت کی ذمہ داری بھی انہوں نے نبھائی۔ اردو زبان و ادب کے فروغ سے انہیں خصوصی دلچسپی تھی۔ وہ ہر سال نئے سال کے موقع پر پابندی کے ساتھ مشاعرے کا اہتمام کرتے تھے، جس میں شہر کی علمی، ادبی اور ثقافتی شخصیات بڑی تعداد میں شرکت کرتی تھیں۔ ان مشاعروں نے کلکتہ کی ادبی روایت کو زندہ رکھنے میں اپنا حصہ ادا کیا۔
بنیادی طور پر جمیل منظر ایک کامیاب تاجر تھے۔ انہوں نے معمولی پیمانے پر کاروبار شروع کیا اور اپنی محنت، صلاحیت اور کاروباری بصیرت کے بل پر کامیابی کی منزلیں طے کیں۔ چمڑے کے کاروبار میں نمایاں کامیابی حاصل کرنے کے بعد انہوں نے ہوٹل کی صنعت میں قدم رکھا اور اس شعبے میں بھی اپنی شناخت قائم کی۔
تاہم ان کی زندگی صرف کاروباری سرگرمیوں تک محدود نہیں رہی۔ تجارت کے ساتھ ساتھ وہ کلکتہ کی ملی، سماجی اور ادبی سرگرمیوں میں بھی سرگرم حصہ لیتے تھے۔ شہر میں علمی و ادبی محفلوں اور مختلف سماجی و ملی پروگراموں کے انعقاد میں ان کی دلچسپی اور تعاون ہمیشہ نمایاں رہا۔ وہ ان سرگرمیوں کی سرپرستی اور مالی معاونت میں کبھی تردد نہیں کرتے تھے۔ ان کے نزدیک کاروباری کامیابی کے ساتھ سماج اور ملت کے لیے کچھ کرنے کی بھی اہمیت تھی۔
جمیل منظر کے انتقال سے کلکتہ نے ایک ایسی شخصیت کھو دی ہے جو تجارت کے ساتھ ملی، سماجی اور ادبی زندگی میں بھی اپنا کردار ادا کرتی رہی۔ ان کی رحلت سے شہر کے سماجی و ملی حلقوں میں جو خلا پیدا ہوا ہے، اسے مدتوں محسوس کیا جائے گا۔
